Abéu, Ferla Megía, Alienda y Melandru van enllenar Lata de Zinc y la organización fai un llamáu a participar el vienres na Semando Folk Session
Otru añu más, el Semando Fest vuelve a vender toles entraes díes enantes de la so celebración. El vienres 8 a les 21h la sala Lata de Zinc va tar enllena pa ver les actuaciones d’Abéu cola so música tradicional axeitada pal baille; Ferla Megía, col so amiestu de pop, folk, triphip, dembow o rap; Alienda, banda de power folk que sigui’l camín de los meyores nomes del folk asturianu; y Melandru, formación de post-rock influyía pol shoegaze, dream pop y el folk. Amás, esti añu’l festival tien dos xornaes al facese’l vienres 7 la Semando Folk Session.
El Semando Fest va más allá de ser un simple conciertu y por eso tien toa una filosofía caracterizada por puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’un conciertu; que reivindica les sales de conciertos como un espaciu afayadizu pal exposigue de la música de raigañu; qu’apuesta por da-y oportunidaes a les y los creadores xóvenes y que trabaya por avanzar hacia la igualdá dientro de la música.
Amás de la cobertura de la radiotelevisión pública y otros medios de comunicación privaos, Alderiques 2.0 va facer esti vienres a les 20h un directu na so canal de Twitch na que van tar presentes componentes de los cuatro grupos participantes na tercera edición del Semando Fest Abéu cola so música tradicional axeitada pal baille; Ferla Megía, col so amiestu de pop, folk, triphip, dembow o rap; Alienda, banda de power folk que sigui’l camín de los meyores nomes del folk asturianu; y Melandru, formación de post-rock influyía pol shoegaze, dream pop y el folk.
Musicasturiana.com y Ixuxú Cultura entamen esti eventu que nesta tercer edición hai una novedá: la Semando Folk Session, una oportunidá pa que toles músiques y músicos mozos que quieran, andechen pa interpretar a comuña los sos temes preferíos de la música tradicional y folk asturiana. La cita va ser el vienres 7 de febreru a les 22h en L’Esperteyu (Uviéu) y nella pueden participar los y les instrumentistes que tengan gana de tocar nesta jam session pionera. Hai un formulariu pa inscribise, anque nun ye obligatoriu rellenalu.
Equipu xoven
Amás de les y los componentes de los grupos, l’equipu del Semando Fest ta formáu por xente mozo: el diseñu y la identidá visual ye obra de la diseñadora Paula Suárez Surimi (Xixón, 1990); Nay Semeya (Llanes, 1999) va facer les semeyes y el videu del festival; Raúl Alonso (Xixón, 1999) y Yedra Riesgo (Pravia, 1997) d’Héroes Ensin Nome van volver a presentar la gala y desendolcar llabores de producción, esto último xunto a Claudia González (Lluanco, 1999).
Xicu Ariza (Xixón, 1989), responsable d’Ixuxú Cultura y Musicasturiana.com, ye’l coordinador de tol proyectu per última vez, yá que al pasar nel 2025 de los 35 años d’edá va dexar la dirección del Semando Fest pa dar relevu nesta xera y asina caltener la coherencia cola filosofía del eventu.
Distintes entidaes públiques y privaes vuelven a patrocinar esti eventu p’ayudar a la so viabilidá económica. Son la Fundación Caja Rural de Asturias, el Conseyu de la Mocedá del Principáu d’Asturies y el Conseyu de la Mocedá d’Uviéu.
